Wyman Wong 專欄| 由「old Celine」講起⋯

Hedi Slimane入主之後的這兩年來，網絡世界多了一個時裝類的熱門hashtag叫做#oldceline，文字表面上看似人畜無害，定神諗真才知並非無毒無菌，打這個井字的KOL或 KOL wannabes 不外乎藉自己對Phoebe Philo的忠心不二，找片品味高地宣示自己是何等素淨優雅，當然不忘順手柴一柴新creative director的台，再踩兩腳品牌揸fit人的有眼無珠唯利是圖……在此有必要利申一下，Phoebe、Hedi我兩個都得嘅，明明可以左擁右抱我何必多餘地自己歸邊，世上很多事情騎牆就最x乞人憎，但買衫是例外的少數，我old與new Celine都可以支持，仍然是逐件衫計數逐個collection評分，做得好就是好，更無必要一 hashtag 打死一船人，不，一車衫先真。

Old is the new New

明明是個「時」字行先的「裝精」，點解廿四個月前嘅流行hashtag現在才重新出土？只因為玩吓玩吓，後來各種各樣的#oldbottegaveneta #oldmarni #oldjilsander #oldburberry⋯⋯都相繼出現了，總之但凡近三五年換過設計師的，都有班自命更識貨的戀舊派出來認叻，well，我有沒有武斷批死這班「#old人」？人家有沒有可能「只係介紹返之嘛」「其實贊成兩代設計師各有各精彩」，所以才想劃清新舊的界線呢？Ummm，將心比己，如果一件衫我要鄭重聲明佢係vintage乜乜乜，就算不是在慨嘆今非昔比新不如舊，點都有啲想曬一曬自己早具慧眼快你一步嘅優越感呱？應該無冤枉咗佢哋啦。

講到呢度，我揭底牌了，本文其實無意探討為什麼總有堆時裝人懶係比你有眼光有品味？懶係早你幾輪玩完玩爛先丟比你哋班普羅大眾？並因而孕育的藐咀藐舌mean言mean語；我真正希望做的，是按下鏡頭右上角的selfie掣，審視一下「做一個有尊嚴的創作人，到底有多麼的不容易」。

簡單來說：「New」是一條多麼難行的路！

Celine FW20

Celine FW20

New Way O不OK？

是的，唇寒齒亡，聽着大家開口一句old Celine，埋口又一句old BV，應份多愁善感得嚟又嫌自己有時over咗的我，同為創作人，若果有一日聽到有人hashtag #oldwyman會不會很傷心呢？

不要笑我今勻太me me me me me，所有靠自家制creative juice貢獻世界兼且交租交水電煤的人，其實都應該一齊us us us us us！

在這個行業的定義上，being New至少可以分為兩種，兩種都好辛苦嘅。

第一種，接手另一位創作者建立的檔攤，除非是一些上手主將一早天怒人怨但唔知點解老細一直唔炒dum咗好耐的罕見案例（唔好以為我舉唔出例子：Gucci以前的Frida Giannini），否則上了軌道的公司，捱得住必有因，一定是之前坐你個位的人都有返咁上下本事，所以亦都有一定數目的忠粉一路供養，無論因為任何原因換了你這個new xx，人的天性通常是死都要比較，不太可以接受「兩個都咁好」或者更明白事理的「兩個根本就唔同，無得比較」⋯⋯總之，一有比較，就算你好彩有一批人投你這個new的支持票，都不可能完全沒有人在ig挖返前任作品出來hashtag #oldxx，而且你還不知這批人這批post可以發酵到多大，會不會大到足以危害到你條命仔⋯⋯就算害你唔死，這種「反後母」情意結亦會跟你一世，耐不耐又會彈出來試圖搞到你不開心，你頂唔頂到都要頂㗎嘞，因為就算你受唔住劈炮唔撈，你都要預咗一樣繼續會有人話你唔夠邊個好，如果你本人內心不夠強大，即使幾多人其實有讚你好都cover唔到㗎！

Frida Giannini

第二種new，是由頭到尾都是你本人做同一個崗位，只不過隨年月推移，你特登或無意間轉了風格，咁亦會有人攞嚟比較（係呀人言真係好乸可畏㗎），很少有人幸運到大家都覺得new you和old you各有各妙，殘忍嘅人類係都要揀個「最愛」出嚟折磨自己和別人，犀利如梵高、畢加索於俗世眼中尚且新舊時期加埋只能有一副食胡牌，你又點敢強求前後逢源早晚開花呢？

咁一生人咬實一道菜一套拳一世都唔轉style又係咪等於「悶人一生平安」呀？我哋又不如recap返呢篇文嘅「始作俑者」阿Hedi Slimane先生，佢咪擺到明我一世只賣一樣嘢（任何聘請他的老闆都是他貪他這一樣嘢賣得好之嘛），你們喜歡呢味嘢便願者上釣吧！結果他加盟Celine時咪就係比人嫌佢無新嘢囉，咪搞出hashtag #oldceline囉陰功。

大概所有能做同一個崗位20年以上的創作人，都等同用作品向世界大嗌了一句：本人樂觀開朗、身體健康、絕無自殺傾向！他日有什麼冬瓜豆腐，都是他殺的，不，tag殺的，hashtag 個tag！