Wyman Wong專欄 | I am not myself (it’s kinda fun!)

年輕時和我一樣以「令旁人側目」為打扮目標的一位女性朋友，終於以四張幾之高齡，憑食尾糊姿態做了別人老母。

我第一樣為她擔心的居然是「咁你第日著咩去接放學同開家長會呀？」你知啦，家長界品流複雜是非極多，我們這種人的服裝品味即使早已所謂「從良」，但入一波慢駛仍然足以令其他同學仔老豆老母，統稱良家婦女正人君子瞠目結舌，即使可以喬裝飛入尋常百姓家，但日日接送喎，呃得一時唔呃得一世……結論是：使唔使買過一批合乎大眾預期端莊大方的「家長裝」，專門在學校活動時當開工衫？

（換了別人，這時卻上心頭的該是早日去Gym加鐘免得細路曉行曉走時氣喘追唔切吧？）

回心一諗，我呢，呢生應該無咁好命可以做人老豆，但幻想一下如果朝朝湊仔返學的這個是自己，「咁我係會著乜嘢呢？」其實也是個幾好玩的思想練習！

事實上，為了某種特定情況而「唔准做自己」，才是最終極的cosplay吧！

像我這種「個性化打扮就是statement就是身份就是一切」的人，由小到大任何被迫穿制服的場合，都要走盡法律罅撚一撚加啲嘢減啲嘢才心息的，一旦要全盤棄守「唔做自己」，一時三刻是好難習慣，所以變態地我反而有點enjoy這種「洗盡鉛華」…… 不只這樣，直頭係「埋名隱性」㖭哈哈哈。

人生中最重要一次「唔做自己」是大學二年班去商台攞遊戲節目獎品，我決定假扮一名「大好青年」去博高層好印象，邀請我試音做DJ，而且居然順利地依照計劃進行，輕易成功改寫了自己的人生。（呢個故仔講過好多次啦，唔長氣啦。）

也很慶幸自己後生嗰陣做過吓演員，名正言順「唔做自己」，著吓一些一世都未著過嘅衫…… 不過話雖如此，當年很多導演找我都是希望我做回一個類似自己的角色，I mean我平日在媒體投射出來的那個「自己」，所以很多時也沒法完全在造型上收埋真我，還是要泄露一點蛛絲馬跡…… 問心我其實覺得「又係做自己」是不夠過癮的，但有緣三次不認自己，原來都是「命水」。

也試過去Barcelona這種出名治安不好的城市旅行，因為聽從過來人建議「千祈唔好著咁靚」，所以那個trip和旅伴們約定「盡量打扮得又窮又肉酸」（咁當然又不能真係太核突），那幾天居然因為這種一反常態而幾好玩，無他嘅，你當自己去咗個有dresscode嘅party，不過呢個party連開六日五夜咁解啫。

另一個賣飛佛「唔做自己」的場合是，收到傳召信去法庭抽簽做陪審團，是的，睇樣可能唔似，但我是個頗盡責的公民，每次收到信絕不推三推四托辭請假缺席，但這個duty call最不容易的，反而是著咩去先尊重場合，不太搶眼又不太時裝，恰如其份地做個「候選陪審團⋯⋯之一」…… 這對我來說難度遠遠高於各種化裝舞會或萬聖節的扮鬼扮馬，由於有挑戰性又好少可有機會做，所以典型雙子座的我，倒是覺得很有趣的。

說起來，當你連每日穿甚麼都要考慮美學和天氣以外的問題時，真懷念那些著咩衫都不用小心睇住的日子。