Wyman Wong 專欄︱恐怖奧斯卡

每一個生意唔好的時裝店老闆走來問我：「點樣先可以賣多啲衫？」我的答案都是一樣的。

「搞Ball吖！搞Party吖！」

真正含義當然不止是搞多些 to see and to be seen 的物理上集會，令人「有心機扮吓靚」咁簡單，在新網絡時代這個建議的意思還可以包括建造一個to see and to be seen的網上平台，總之對好多人來說，完全零收視無人睇，難免覺得氣餒「着咁靚做乜唧」，告訴你閂埋門着到隻雀咁只為「取悅自己」的，都是懶有性格的假正經，為了講出嚟嗰吓好似好有型咁，人同此心，點會話真係甘心錦衣夜行，這是同懷才不遇同級數的飲恨，好大杯的恨！

2

Chanel SS2021 fashion show

2020的時裝大疫年

今年無街出，想搞Ball搞Party都無得搞，連我覺得這條算好使好用的sell衫怪招最後都斷埋纜…..亦難怪，嗜買如我今年是半世紀以來最無心機買衫的。買反而不是最大問題，買咗無機會着塞晒喺到阻碇，亦是一種篤眼篤鼻的煩惱，最慘是不知何日回復正常？如果到了2022還要着一批來自19-21的「Old New clothes」（或者「New old clothes」，whatever 啦吓！），也是一種酷刑！是的，眼前明明有新鮮出爐的22新裝，但之前三年買落的「新衫」如果唔着吓又怕折墮俾雷劈……所以前景未明朗前，暫時唔買咁多seasonal的設計，大家都唔會怪我唔夠愛Fashion啩？

電視劇《Pose》（圖片來源：The Independent）

好吧，諗唔到著去邊？咪創造一個場合出來囉。光是傳統的social media是不夠的，因為這種純靠自發性自由進出的活動，是欠缺推動力的，當大家WFH到都成各種開會軟件專家之際，你至少要特登搞個似模似樣的網上event，才能引到我買件新衫煞有介事咁半夜喺屋企着一次「charp」低張相upload上網吧？

當人人都困喺屋企悶到聽到乜乜challenge都唔理三七廿一仆到去post相時，其實網上dress code party有得諗吖，小規模嘅可以參考電視劇《Pose》裡面80年代美國黑人社區的「the category is ⋯⋯」爭妍鬥麗，玩豪啲嘅直頭搵人辦個「網上Met Gala」⋯⋯吖笨！橫掂大家都無乜節目，時裝精們至少有多個「世藝」，賣衣服的賣得多一件就一件啦。

搞啦！仲呻話成日都開唔到一張單的大小時裝店們！

也是頒獎禮的大饑荒

叉開一句半題外話，即使你避得開病毒唔駛病唔駛死，我覺得全球人類都等於「至少減壽一年」，百業皆廢，乜都唔做得，做得都未必敢做，於是按兵不動想睇定啲，就算有好產品唔想衝出去送死，咁樣浪費咗幾百日仲唔係人人都短咗一年命？

各種手尾長之中，我覺得最大鑊的可能是未來一至幾年的各式頒獎禮，由底至面都會受到嚴重的牽連。

英國 BAFTA TV Awards 2020（圖片來源：BBC）

先說無咁肉痛的「面」，由於無實體頒獎典禮，所以Red Carpet都唔知暫停到幾時，以等睇靚衫為生活中重要期盼的粉絲和毒舌們將會面臨一場大饑荒。

暫時見到的折衷方式有幾款，有像香港電影金像獎2020一樣同一個主持兼頒獎人，一個人一套衫拆晒十幾個信封快快脆脆讀晒佢就算的；也有像英國 BAFTA TV Awards 2020那樣，叫每個候選人都set個zoom之類嘅software，拍住自己喺屋企等錄影廠宣佈結果的（雖然大橋OK但執行上可以改進，比如一堆nominees 都無服裝指示，着晒晚裝又有牛記笠記又有，最重要是讀名一刻竟然甩開晒有齊五個候選人特寫的那個分割畫面，可能係好心地唔想影住落選者個尷尬樣啩，但去得頒獎禮，其實候選人都預咗有呢個鏡頭，即使落選都決定咗豪比你㗎啦，亦都一早諗定咗到時交咩戲㗎啦！），亦有好像 2020 MTV VMA一樣，一早通知咗得獎人去錄影廠個幕後面等出場，雖然犧牲了即時宣讀那5個候選人的緊張表情與節目氣勢，但至少有一位明星一套靚衫睇吓吖！唔知嚟緊的疫境頒獎禮還有什麼花臣，而最快舉行的應該是9月底的Emmy Awards了，不妨看看這種「限聚式頒獎典禮」有沒有更好的進化。

不過更大劑的應是頒獎禮個「底」吧，即是它們的核心內容。如果因為疫情大家都無機會製作好作品，又或者整好了都唔捨得拎出來住，那麼下一次的頒獎禮提名名單將會很恐怖，平時95分以上才能入圍的，今年度可能50分就OK。

這我覺得音樂和電視獎項初期還OK，因為大家都比較不會「唔出住」，電視界第一年可能更逆市地更欣欣向榮，原因是人人困在家睇電視的時間多了，以前那個環境會睇漏眼的會變成滄海遺珠的，終於有人賞識……不過如果唔出得街而影響了製作水準和進度，長遠來說，當第一批「正嘢」播完又無力為繼時，下年的音樂和電視頒獎禮也可以是很「蜀中無大將」的。

Oscars 2020（圖片來源：The Oscars）

但最慘不忍睹的會是奧斯卡為首是幾個大型電影頒獎禮吧，啲好戲拍起都因為戲院未開唔上住，咁出年Oscar有乜人乜戲得到提名可想而知，2021年3月的奧斯卡會是最容易攞獎的一屆吧？除非他們和香港電影金像獎和台灣金馬獎一樣，喺咁咦公映過一場已符合提名資格而唔需要major release住啦。

否則，前兩年本來都已經幾勁的Netflix，在這無大片上戲院的一年，以一批streaming 的電影橫掃Academy Award亦都唔奇囉。